పవన్ కళ్యాణ్ ప్రసంగం: పుణె బాలాజీ నగర్ సభలో ప్రధాన అంశాలు

వారాహి మీడియా డాట్ కామ్ ఆన్ లైన్ న్యూస్, నవంబర్ 18,2024: పుణె కంటోన్మెంట్ నియోజకవర్గంలోని బాలాజీ నగర్ వద్ద నిర్వహించిన సభలో జనసేన అధ్యక్షులు, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ పాల్గొన్నారు.

ఈ సందర్భంగా ఆయన ప్రసంగించిన ముఖ్యాంశాలు:

సుస్థిర ప్రభుత్వ అవసరం:
దేశం లేదా ఏ ప్రాంతమైనా అభివృద్ధి చెందాలంటే స్థిరమైన ప్రభుత్వం ఎంతో కీలకం. సుస్థిరత అనేది అపారమైన శక్తి కలిగి ఉండి, అభివృద్ధికి మార్గం చూపుతుందని పవన్ కళ్యాణ్ చెప్పారు.

మోడీ నాయకత్వం అభివృద్ధికి మార్గం:
గత దశాబ్ద కాలంగా నరేంద్ర మోడీ నాయకత్వంలో భారతదేశం ఆర్థిక అభివృద్ధి, సంక్షేమం, ప్రగతిలో ముందుకు సాగుతోందని కొనియాడారు. ఈ యజ్ఞంలో ప్రతి ఒక్కరూ భాగస్వామ్యం కావాలని పిలుపునిచ్చారు.

మహాయుతి ఐక్యతకు మద్దతు:
మహారాష్ట్ర ప్రజలను ఐక్యంగా కలిపి, మహాయుతి కూటమికి మద్దతు ఇవ్వాలని కోరారు. కులాలు, మతాలు, ప్రాంతాల పేరిట ప్రజలను విడదీసే వారికి ప్రజలు సముచిత బుద్ధి చెప్పాలని సూచించారు.

నరేంద్ర మోడీ ప్రస్థానం:
ఒక చాయ్ వాలాగా తన ప్రస్థానాన్ని ప్రారంభించి, ఎన్నో అవమానాలు, ఆటంకాలను ఎదుర్కొని, భారతదేశాన్ని విశ్వ పటంలో ప్రత్యేకంగా నిలిపిన నరేంద్ర మోడీ సేవలు అపారమని ప్రశంసించారు. ఛత్రపతి శివాజీ మహారాజ్ స్ఫూర్తితో మహారాష్ట్ర ప్రజలు మరోసారి ఎన్డీఏ కూటమిని నమ్మాలని పిలుపునిచ్చారు.

మహారాష్ట్ర అభివృద్ధిలో మహాయుతి పాత్ర:
రోడ్లు, అభివృద్ధి, సంక్షేమం, ఆర్థిక వృద్ధి వంటి అంశాల్లో మహారాష్ట్ర కీలక పాత్ర పోషిస్తుందని చెప్పారు. ఐదు ట్రిలియన్ డాలర్ల ఆర్థిక వ్యవస్థగా భారతదేశం రూపాంతరం చెందడంలో మహారాష్ట్ర పాత్ర కీలకమని పవన్ కళ్యాణ్ అభిప్రాయపడ్డారు.

పుణేతో ప్రత్యేక అనుబంధం:
పవన్ కళ్యాణ్ తనకు పుణేతో ప్రత్యేక అనుబంధం ఉందని, తన ఇద్దరు పిల్లలు ఇక్కడ చదువుకున్నారనే విషయాన్ని గుర్తు చేశారు. పుణేలో 16,000 మంది తెలుగు ప్రజలు ఉన్నారని, వారు ఐక్యంగా ఎన్డీఏ ప్రభుత్వానికి మద్దతు ఇవ్వాలని కోరారు.

బాలాజీ ఆలయ ప్రత్యేక సేవా కేంద్రం:
పుణే కంటోన్మెంట్‌లోని బాలాజీ ఆలయానికి ప్రత్యేక సేవా కేంద్రం ఏర్పాటుకు తిరుమల తిరుపతి దేవస్థానం అధికారులతో చర్చిస్తానని హామీ ఇచ్చారు.

ఎన్డీఏ అభ్యర్థుల గెలుపు కోసం పిలుపు:
పుణే కంటోన్మెంట్ నుంచి సునీల్ కాంబ్లె, హడస్పర్ నుంచి చేతన్ తుపే గెలుపు కోసం ప్రతి ఒక్కరు పనిచేయాలని, మహారాష్ట్ర అభివృద్ధిలో భాగస్వామ్యులవ్వాలని ఆయన పిలుపునిచ్చారు.

మహారాష్ట్ర వికాసం కోసం ఎన్డీఏ కూటమి నాయకత్వాన్ని నమ్మాలని పవన్ కళ్యాణ్ స్పష్టం చేశారు.

About Author