వైద్యం విషయంలో నిర్లక్ష్యం: కళాకారుడి తల్లి మృతిపై వాసవి మెడికల్ సెంటర్‌కు జరిమానా

వారాహి మీడియా డాట్ కామ్ ఆన్ లైన్ న్యూస్,హైదరాబాద్,సెప్టెంబర్ 8, 2025: హైదరాబాద్ మసాబ్‌ట్యాంక్‌కు చెందిన ప్రముఖ లైవ్ స్టాట్యూ ఆర్టిస్ట్ డా. ఏ. రాజేశ్ తన తల్లి మరణానికి కారణమైన వైద్య నిర్లక్ష్యం గురించి మీడియా సమావేశంలో వెల్లడించారు.

ఎఫ్‌టీసీసీఐ, రెడ్ హిల్స్‌లో నిర్వహించిన ప్రెస్‌మీట్‌లో మాట్లాడుతూ వైద్యుల అజాగ్రత్త వల్ల తల్లి ప్రాణాలు కోల్పోయానని, ఇలాంటి ఘటనలు మరల జరగకూడదని ప్రజలకు హెచ్చరికగా కోర్టును ఆశ్రయించానని చెప్పారు.

2020 నవంబర్ 13న, డా. రాజేశ్ తల్లి శ్రీమతి అలిగాటి శారద (76) లక్డీకాపూల్ వాసవి మెడికల్ & రీసెర్చ్ సెంటర్‌లో సాధారణ యాంజియోగ్రామ్‌ కోసం చేరారు. కానీ, వైద్యుల నిర్లక్ష్యం కారణంగా శస్త్రచికిత్స మధ్యలోనే ప్రాణాలు కోల్పోయారు. సీనియర్ కార్డియాలజిస్టు డా. శ్రీకాంత్ రెడ్డి, హెడ్ ఆఫ్ కార్డియాలజీ డా. నాగేశ్వర్‌రావు తొందరపెట్టి స్టెంట్ ప్రక్రియ చేయడం వల్లే ఈ విషాదం చోటుచేసుకుందని డా. రాజేశ్ ఆరోపించారు.

ఈ నేపథ్యంలో ఆయన వినియోగదారుల వివాద పరిష్కార కమిషన్ – III, హైదరాబాద్‌లో కేసు వేశారు. సుదీర్ఘ విచారణ అనంతరం కోర్టు ఇటీవల వెలువరించిన తీర్పులో ఆసుపత్రి, వైద్యులను నిర్లక్ష్యం కారణంగా దోషులుగా తేల్చి జరిమానా విధించింది.

“నా పోరాటం డబ్బుకోసం కాదు. నా తల్లిని తిరిగి ఎవరూ ఇవ్వలేరు. కానీ వైద్యులు బాధ్యత వహించాలనే ఉద్దేశంతోనే కోర్టు ద్వారానే న్యాయం కోరాను. ప్రజలు కూడా వైద్యులు చెప్పిన ప్రతి నిర్ణయాన్ని అజాగ్రత్తగా అంగీకరించకుండా తప్పనిసరిగా రెండో, మూడో అభిప్రాయాలు తీసుకోవాలి” అని డా. రాజేశ్ స్పష్టం చేశారు.

తన తల్లిని “ప్రత్యక్ష దేవత”గా భావించిన ఆయన, కళారూపాల ద్వారా ఆమె జ్ఞాపకాలను నిలబెట్టుకున్నారు. 25 ప్రత్యేక చిత్రాల్లో ఒకటి ఆమె పేరును అక్షరాల రూపంలో మలిచిన చిత్రం కాగా, మరొకటి ఆమె ఆంగ్ల సంతకం ఆధారంగా రూపొందించిన కళాఖండం. అంతేకాదు, ఆమెకు సజీవ విగ్రహాన్ని కూడా తీర్చిదిద్దారు.

ఈ ప్రెస్‌మీట్‌లో డా. రాజేశ్‌తో పాటు కుటుంబ సభ్యులు, స్నేహితులు, న్యాయవాదులు పాల్గొన్నారు. వారు కలసి వైద్యుల నిర్లక్ష్యంపై కఠిన చర్యలు తీసుకోవాలని, వైద్యరంగంలో బాధ్యతను పెంచాలని అధికారులను కోరారు.

About Author

varahimedia.com

See author's posts