పిఠాపురం అభివృద్ధికి పవన్ కళ్యాణ్ దిశానిర్దేశం

వారాహి మీడియా డాట్ కామ్ ఆన్ లైన్ న్యూస్,మార్చి27,2025: పిఠాపురం నియోజకవర్గంలో చేపట్టిన అభివృద్ధి పనులను నిర్దేశిత గడువులోపు పూర్తి చేయాలని రాష్ట్ర ఉప ముఖ్యమంత్రి పవన్ కళ్యాణ్ అధికారులను ఆదేశించారు. మౌలిక సదుపాయాల కల్పనలో అధికారులు చురుగ్గా వ్యవహరించాల్సిన అవసరముందన్నారు. పంచాయతీరాజ్, గ్రామీణాభివృద్ధి శాఖ నిధులతో చేపడుతున్న రహదారి పనులు, ఉపాధి హామీ పథకాల అమలుపై సమీక్ష నిర్వహించి, పురోగతి నివేదికలు సిద్ధం చేయాలని సూచించారు.

మౌలిక వసతులపై ప్రత్యేక దృష్టి

పిఠాపురం నియోజకవర్గంలోని గ్రామాలు, మున్సిపాలిటీ, గొల్లప్రోలు నగర పంచాయతీల్లో తాగునీటి సరఫరాపై ప్రత్యేక శ్రద్ధ వహించాలని అధికారులను పవన్ కళ్యాణ్ ఆదేశించారు. వేసవి కాలంలో నీటి సరఫరాకు ఎలాంటి అంతరాయం కలగకూడదని స్పష్టం చేశారు. సమ్మర్ స్టోరేజ్ ట్యాంకుల వద్ద తనిఖీలు జరిపి, తగిన చర్యలు తీసుకోవాలని సూచించారు.

Read this also…Wishing Ram Charan Greater Heights of Success:Pawan Kalyan

ఇది కూడా చదవండి..రామ్ చరణ్‌కు హృదయపూర్వక జన్మదిన శుభాకాంక్షలు తెలిపిన పవన్ కళ్యాణ్

అభివృద్ధి పనులపై కఠిన ఆదేశాలు

నియోజకవర్గ అభివృద్ధికి విభిన్న పథకాల ద్వారా నిధులు సమకూరుస్తున్నామని, వాటిని సమర్థంగా వినియోగించి ప్రజలకు మేలు చేయాలని అధికార యంత్రాంగాన్ని ఉప ముఖ్యమంత్రి ఆదేశించారు. “ప్రతి వారం అభివృద్ధి పనులపై సమీక్ష నిర్వహిస్తాను. పనుల నాణ్యతకు ప్రత్యేక బృందాల ద్వారా తనిఖీలు జరిపించనున్నాము,” అని పేర్కొన్నారు.

కీలక ప్రాజెక్టుల అమలు

• టిడ్కో గృహాల వద్ద రూ.3 కోట్లతో 5 ఎం.వి.ఎ సామర్థ్యం కలిగిన సబ్‌స్టేషన్ నిర్మాణం
• అమృత్ 2.0 ద్వారా పిఠాపురం పట్టణ తాగునీటి సమస్య పరిష్కారం
• రూ.59.7 కోట్లతో పిఠాపురం–ఉప్పాడ రైల్వే గేటు వద్ద ట్రాఫిక్ సమస్యకు శాశ్వత పరిష్కారం
• ఉపాధి హామీ పథకం కింద రూ.40.2 కోట్లతో 444 రోడ్డు పనులు
• 431 గోకులాల ఏర్పాటు
• పిఠాపురం ప్రభుత్వ ఆసుపత్రిని ఏరియా హాస్పిటల్‌గా అప్‌గ్రేడ్ చేయడానికి రూ.38.32 కోట్ల నిధులు మంజూరు

శాంతిభద్రతలపై సమీక్ష

పిఠాపురం నియోజకవర్గంలో శాంతిభద్రతల అంశంపై పోలీసు అధికారులతో ప్రత్యేక సమీక్ష నిర్వహించిన పవన్ కళ్యాణ్, నాలుగు పోలీస్ స్టేషన్లలోని పరిస్థితిపై ఇంటెలిజెన్స్ నివేదిక సమర్పించాలన్నారు. అవినీతి పరులపై కఠిన చర్యలు తీసుకోవాలని స్పష్టం చేశారు. ప్రజలను ఇబ్బందులకు గురిచేసే నేరస్తులను మాత్రమే కాకుండా, వారికి మద్దతుగా ఉన్న రాజకీయ నాయకులు, పోలీసులు కూడా ఉపేక్షించబోమని హెచ్చరించారు.

“గౌరవ ప్రధాన మంత్రి నరేంద్ర మోదీ నేతృత్వంలో కేంద్ర ప్రభుత్వం, గౌరవ ముఖ్యమంత్రి చంద్రబాబు నాయుడు మార్గదర్శకత్వంలో రాష్ట్ర ప్రభుత్వం అభివృద్ధి పనులను వేగవంతం చేస్తోంది. అధికారులు, ఉద్యోగులు సానుకూల దృక్పథంతో పని చేస్తే మాత్రమే ప్రజలకు మరింత మేలు జరుగుతుంది” అని పవన్ కళ్యాణ్ పేర్కొన్నారు.

About Author