2034 వరకు ఇందిరమ్మ రాజ్యమే ! : సీఎం రేవంత్ రెడ్డి

వారాహి మీడియా డాట్ కామ్ ఆన్ లైన్ న్యూస్,సిద్దిపేట,నవంబర్ 19,2026: తెలంగాణలో 2029లోనూ కాంగ్రెస్ పార్టీయే విజయం సాధిస్తుందని, 2034 వరకు ఇందిరమ్మ రాజ్యమే కొనసాగుతుందని ముఖ్యమంత్రి రేవంత్ రెడ్డి స్పష్టం చేశారు. సిద్దిపేటలో నిర్వహించిన బహిరంగ సభలో ఆయన మాట్లాడుతూ..

revanth-reddy

వారాహి మీడియా డాట్ కామ్ ఆన్ లైన్ న్యూస్,సిద్దిపేట,నవంబర్ 19,2026: తెలంగాణలో 2029లోనూ కాంగ్రెస్ పార్టీయే విజయం సాధిస్తుందని, 2034 వరకు ఇందిరమ్మ రాజ్యమే కొనసాగుతుందని ముఖ్యమంత్రి రేవంత్ రెడ్డి స్పష్టం చేశారు. సిద్దిపేటలో నిర్వహించిన బహిరంగ సభలో ఆయన మాట్లాడుతూ.. భారాస అధినేత కేసీఆర్, మాజీ మంత్రి హరీశ్ రావుపై తీవ్రస్థాయిలో విరుచుకుపడ్డారు. సిద్దిపేటలో కాంగ్రెస్ అభ్యర్థిని ఎమ్మెల్యేగా గెలిపిస్తే మంత్రిని చేసే బాధ్యత తనదని ఆయన ప్రజలకు హామీ ఇచ్చారు.

ఇదీ చదవండి:నిబంధనలు పాటించని ప్రైవేట్ ఆసుపత్రులపై చర్యలు తీసుకుంటాం : జగిత్యాల జిల్లా అదనపు కలెక్టర్ ప్రసన్నాంబ

ఇదీ చదవండి:సర్వీసెస్ ఎక్స్‌ప్రెస్‌తో దక్షిణాదికి మొబైల్ సర్వీస్ ఇన్నోవేషన్ హబ్‌ను తీసుకువచ్చిన ష్నైడర్ ఎలక్ట్రిక్..

మెడికల్ కాలేజీకి అనంతుల మదన్ మోహన్ పేరు..


తెలంగాణ ఉద్యమంలో క్రియాశీల పాత్ర పోషించిన అనంతుల మదన్ మోహన్ పేరును చరిత్ర నుంచి చెరిపేయడానికి కేసీఆర్, హరీశ్ రావు కుట్రలు చేశారని సీఎం ఆరోపించారు. సిద్దిపేట గడ్డపై 1983లో కేసీఆర్‌ను ఓడించి కాంగ్రెస్ జెండా ఎగరేసిన ఘనత మదన్ మోహన్‌దేనని గుర్తు చేశారు.

ఆయన సేవలకు గౌరవంగా సిద్దిపేట మెడికల్ కాలేజీకి అనంతుల మదన్ మోహన్ పేరు పెట్టాలని వైద్యారోగ్య శాఖ మంత్రి దామోదర రాజనర్సింహను వేదికపై నుంచే ఆదేశించారు. రాజకీయ భిక్ష పెట్టిన మదన్ మోహన్‌పైనే పోటీకి దిగిన కేసీఆర్.. ఎమ్మెల్యేను చేసిన ఎన్టీఆర్‌కు, మంత్రిని చేసిన చంద్రబాబుకు వెన్నుపోటు పొడిచారని విమర్శించారు.

వేల కోట్ల ఆస్తులు ఎలా వచ్చాయి..?


2004లో వార్డు మెంబర్ కూడా కాని హరీశ్ రావు.. వైఎస్ రాజశేఖరరెడ్డి భిక్షతో మంత్రి అయ్యారని, ఆనాటి నుంచే సిద్దిపేటలో కాంగ్రెస్‌పై కుట్రలు మొదలుపెట్టారని రేవంత్ రెడ్డి మండిపడ్డారు.

“తొలి తరంలో చెరుకు ముత్యంరెడ్డి, మలి తరంలో సోలిపేట రామలింగారెడ్డి, సిరిసిల్లలో పాపారావు, జగ్గారెడ్డి, ఉద్యమకారుడు లక్ష్మణ్ ఆర్థికంగా చితికిపోతే.. కేసీఆర్ కుటుంబానికి, హరీశ్ రావుకు, కేటీఆర్ మామకు, హరీశ్ బామ్మర్ది సుమన్ రావుకు వేల కోట్ల ఆస్తులు, ఫామ్‌హౌస్‌లు ఎలా వచ్చాయి?” అని ప్రశ్నించారు.

పదేళ్ల పాలనలో కుటుంబ సభ్యులకు, పార్టీ ఫిరాయించిన వారికి పదవులు ఇచ్చి.. శ్రీకాంతాచారి తల్లి శంకరమ్మకు అన్యాయం చేశారని ధ్వజమెత్తారు. తమ ప్రజా ప్రభుత్వంలో శంకరమ్మకు, చాకలి ఐలమ్మ మనుమరాలికి మహిళా కమిషన్ సభ్యులుగా అవకాశం కల్పించామని తెలిపారు.

అసెంబ్లీలో చర్చకు రండి..


సాగునీటి అంశంపై భారాస నేతలు మొసలి కన్నీళ్లు కారుస్తున్నారని సీఎం విమర్శించారు. “2014లో సాగునీటి మంత్రిగా ఉన్న హరీశ్ రావుకు రెండోసారి ఎందుకు ఆ పదవి ఇవ్వలేదు? నీ కక్కుర్తితోనే కాళేశ్వరం ‘కూలేశ్వరం’గా మారింది.

చంద్రబాబుతో కుమ్మక్కై, ప్రగతి భవన్‌లో జగన్‌కు స్వాగతం పలికి రాయలసీమ లిఫ్ట్ కట్టుకోమని చెప్పి పాలమూరుకు అన్యాయం చేసింది మీరు కాదా?” అని నిలదీశారు. మీ జాతకాల చిట్టా విప్పుతానని, దమ్ముంటే అసెంబ్లీలో చర్చకు రావాలని సవాల్ విసిరారు. కేసీఆర్, హరీశ్ రావు, కేటీఆర్, సంతోష్ రావులను ‘దుష్ట చతుష్టయం’గా అభివర్ణించారు.

అభివృద్ధి, సంక్షేమమే మా అజెండా..


1983 నుంచి 2023 వరకు గత ప్రభుత్వాలు ప్రవేశపెట్టిన ఏ ఒక్క పథకాన్ని తాము ఆపలేదని, వాటిని కొనసాగిస్తూనే కొత్త సంక్షేమ పథకాలను అమలు చేస్తున్నామని సీఎం రేవంత్ రెడ్డి వివరించారు.

రైతులకు రూ.2 లక్షల రుణమాఫీ, రూ.36 వేల కోట్ల రైతు భరోసా, సన్న వడ్లకు బోనస్ అందించామని, వ్యవసాయ రంగానికి రూ.1.78 లక్షల కోట్లు ఖర్చు చేశామని తెలిపారు.

మూడేళ్లలో 8 లక్షల ఇందిరమ్మ ఇళ్లు మంజూరు చేయగా, ఇప్పటికే 2 లక్షల ఇళ్లు పూర్తయ్యాయని పేర్కొన్నారు.

పేదలకు కొత్త రేషన్ కార్డులు, సన్నబియ్యం, 200 యూనిట్ల ఉచిత విద్యుత్, ఆడబిడ్డలకు ఉచిత బస్సు ప్రయాణం, కోటి మందికి కోటి చీరలు, 75 వేల ప్రభుత్వ ఉద్యోగాలు ఇచ్చినట్లు వివరించారు.

భారాసకు గతమే తప్ప భవిష్యత్తు లేదని, ప్రజలు బానిసత్వం కావాలో.. ప్రజా పాలన కావాలో ఆలోచించుకోవాలని ముఖ్యమంత్రి పిలుపునిచ్చారు.

About Author